صباح الخير ..
اول موضوع بالمدونه راح اتكلم لكم فيه عن منتجين من ماركه بايودرما من مجموعه وايت اوبجكتف
هالنوعين تحديدا" تختص بتفتيح وبتقشير البشره بطريقه آمنه وخفيفه وعلاج التصبغات الجلديه كالأسمرار، النمش الخفيف السطحي البقع وآثار حب الشباب ..
الهدف الرئيسي توحيد لون البشره واصلاح عيوبها والتقليل من انتاج تصبغات الميلانين المسببه للبقع الداكنه المكون المهم بهالمجموعه فيتامين سي وعرق السوس جميعها تساعد على تفتيح البشره
الماركه صناعه فرنسيه مناسبه لجميع انواع البشرات ومنها الحساسه متوفره بااغلب الصيدليات تعتبر نوعا" ما اسعارها مرتفعه وفي تزايد ..
نبدا مع كريم النهار
white objective fluide spf 25
المنتج مخصص للنهار من علامه الشمس المرسومه على العلبه بتعرفو اكيد ...قوام المنتج كريمي ابيض سائل اقرب للوشن يحتوي على عامل حمايه من الشمس وايضا" فيتامين سي ومضادات أكسده هذا اول منتج بدت فيه واستخدمته لوحده اسبوع كامل بدون السيروم الليلي لان بشرتي من الصعب تتقبل اي منتج بسهوله فحبه حبه طبيعه بشرتي مختلطه لعاديه واحيان جافه والاهم حساااسه ..
الكريم توزيعه سهل وتتشربه البشره بسرعه يعطي البشره اشراق ونضاره وتبيض بشكل خفيف فوري يحسن من منظر البشره فعلا" استفدت منه بهالشغله كان 2 *1 علاجي وجمالي كنت اكتفي هالفتره ببلاشر خفيف لان جد بشرتي كانت نضره وكانه عليها كريم ملون موحد للبشره اكثر شي حبيته بالكريم انه ماحسس بشرتي ابدا"تقبلت بشرتي المنتج وارتاحت عليه .
السيروم الليلي المركز
white objective serum
بالاول بوضح نقطه مهمه المنتج يحتوي على سائل بالعلبه وبودره فيتامين سي فى الانبوله الصغيره بالبدايه تكسرى الانبوله وتفرغي محتواها بالعلبه وترجي المنتج قبل الاستخدام حتى تمتزج البودره بالسائل بشكل ممتاز ..بهالمجموعه السيروم الليلي الاكثر فاعليه في التفتيح لانه يحتوي على فيتامين سي بشكل مركز واقوى من كريم النهار بالاضافه لوجود حمض الجليكوليك الي يساعد على تقشير البشره بطريقه آمنه هالحمض تقريبا يدخل بااغلب منتجات تقشير وتجديد البشره السيروم مخصص فقط لليل ماينفع ولابشكل تسخدميه في النهار البشره تصير اكثر حساسيه لااشعه الشمس ونسيت انبه على شكل الهلال المرسوم على العلبه فهذا يميز سيروم الليل ..
نبدا مع الاستخدام : قوام المنتج سائل شبه شفاف يميل للون الاصفر عند توزيعه تبقى طبقه على البشره مايجف بسرعه
وياخذ وقت يجلس يتلصق كذا شويه وفجاءه تنشد بشرتك معااه اشبه ماتكوني حاطه ماسك ..لاحظت انه صار يسلع لسعات خفيفه تغاضيت عنها خصوصا ان المنتج جديد لسه ماتقبلته بشرتي اول يوم من استخدامه صحيت اغسل وجهي لاحظت طفح جلدي بشكل كبير خاصه على خدي الايمين وموزع بشكل دوائر على الخد الثاني اشبه ماتكوني موزعه بلاشر كريمي قوي
تضايقت حيييل واخذت المنتج أقرا عن مكوناته ولقيت انه من مضاعفات حمض الجليكوليك انه ممكن يسبب مثل حروق الشمس على البشره تسمتر كم يوم وتخف تدريجا"؟ هنا احترت اكمل بالمنتج او اوقفه والصيدلي قال لي انها تناسب البشرات الحساسه وزياده انه دافعه فيه مبلغ وقدره مو رخيص بس بما انه قال كم يوم وتخف عزمت من أمري وتوكلت عليه وكملت ...
رجعت استخدمه بس بشكل متقطع ليله وليله لا من اسبوع خف الطفح الجلدي والى اسبوع وشوي خف الاحمرار بشكل كامل بس صارت تطلع لي حبوب صغيره في الاماكن الحساسه من الوجه حوالي الشفايف حوالي الانف ماكانت مضايقتني كثير خصوصا انها صغيره ومتنقله تطلع وتختفي بكم يوم وماتترك اثر يعني السيروم يطلعها ويعالجها ههههههههههه فتح لي البقع الداكنه لما استخدمته فرقت معاي بشرتي من حيث المنظر والملمس يعني تخيلو بشره صافيه في اماكن ومبسوطه فيها وتطلع لك كم حبه تخرب المنظر كاامل للامانه مااعطيته حق الاستخدام كنت اوقفه اسبوع لو عندي مناسبه عشان ماتطلع لي الكم حبه
بعد شهرين من الاستخدام :
كريم النهار تفتيحه للبشره بشكل بسيط يحسن من مشاكلها ولكن نتائجه بطئيه
سيروم الليل مااحكم عليه بشكل قاطع خصوصا ان تجربتي معه كانت في اخذ وعطاء اوقفه لفترات بس نتيجته افضل من الكريم في التفتيح تركيزه كان بشكل مكثف كانت عندي بقعه داكنه اسفل خدي ساعد المنتج في تفتحيها عيبه من وجهه نظري انه مايناسب البشرات الحساسه صبرت على عيوبه لفتره غير انه مده استخدامه قليله تحكمه مده صلاحيه اتذكر كانت 50 يوم او 60 مااتذكر بالضبط بس مكتوب على العبوه وبعدها يتاكسد يقلب للون البني الاسود وغير قابل للاستخدام بديت الاحظه في الغطاء لما اسكره الجزء المعرض للهواء تغير لونه ووقفته ..
المختصر : توقعت النتيجه اكبر من هذا خصوصا ان سعرها مو قليل المنتج الواحد اخذته ب 200_250 مو متذكره بالضبط بكم
وسعرها مازال في تزايد يمكن الي زاد بشهرتها انهم يقولو تنفع للاماكن الحساسه والركب والاكواب صراحه ابدا" ماغامرت ولاجربتها عليها كانت تجربي مقتصره على الوجه ..
الكريم حبيته على البشره آمن بس استخدامه غير مرضى على سعره ..السيروم حبيته وماحبيته علاقتي فيه متناقضه
